ಎರಡು ವರ್ಷದ ಮೊದಲ ಒಂದು ದಿನ, ಎಡನೀರು ಮೇಳದ ಆಟ ಗಿರಿನಗರದ ಗಣಪತಿ ದೇವಾಲಯದ ಬಳಿ. ಪ್ರಸಂಗ ವೀರಮಣಿ ಕಾಳಗ ಮತ್ತು ರಕ್ತ ರಾತ್ರಿ . ಬೆಂಗಳೂರಿಗೆ ಬಂದಮೇಲೆ ಎಡನೀರು ಮೇಳದ ಹಲವು ಆಟ ನೋಡಿದ್ದರೂ ಈ ಆಟ ಮಾತ್ರ ಅಚ್ಚಳಿಯದ ನೆನಪನ್ನು ಛಾಪು ಮೂಡಿಸಿದೆ. ಅಂದು ಅಮ್ಮಣ್ಣಾಯರು ಭಾಗವತರಾಗಿ ಕುಳಿತಕೂಡಲೇ ಯಕ್ಷಗಾನದ ಲಯವೇ ಬದಲಾಗಿಬಿಟ್ಟಿತು.ಅಮ್ಮಣ್ಣಾಯಾರ ಭಾಗವತಿಕೆ ವೀರ ರಸದ ಪ್ರಸಂಗಗಳಿಗೆ ಹೊಂದುವುದಿಲ್ಲ ಎಂಬ ಸಣ್ಣ ಭಾವನೆ ಮನಸ್ಸಿನ ಮೂಲೆಯಲ್ಲಿತ್ತು.
ಅದು ಮೊದಲು ತುಳು ಪ್ರಸಂಗಗಳನ್ನೇ ಅಧಿಕವಾಗಿ ನೋಡಿದ ಪರಿಣಾಮವೋ ಏನೋ.? ವೀರಮಣಿ ಕಾಳಗ ಮತ್ತು ರಕ್ತ ರಾತ್ರಿಯಂತಹ ಪ್ರಸಂಗ ಅಮ್ಮಣ್ಣಾಯರ ಸೂತ್ರಧಾರಿಕೆಯಲ್ಲಿ ಹೇಗೆ ಪ್ರದರ್ಶನಗೊಳ್ಳಬಹುದು ? ಎಂಬ ಕುತೂಹಲ ಇದ್ದೆ ಇತ್ತು. ಆ ಕುತೂಹಲ ಒಂದು ಸುಂದರ ಆಟ ನೋಡುವಲ್ಲಿ ತಣಿಯಿತು.
ನಾನು ನೋಡಿದ ಅತ್ಯದ್ಭುತ ಹಿಮ್ಮೇಳದ ಜತೆಗಾರಿಕೆಯಲ್ಲಿ ಇದ್ದೂ ಒಂದು ಎಂದನಿಸಿತು. ಅಮ್ಮಣ್ಣಾಯರೊಂದಿಗೆ ಪ್ರಭಾಕರ ಗೋರೆ, ಚೆಂಡೆಯೊಂದಿಗೆ ಯುವ ಪ್ರತಿಭಾವಂತ ನಿಡ್ಲೆ ಅಜ್ಜನ ಪಟ್ಟ ಶಿಷ್ಯ ದೇಲಂತ ಮಜಲು ಸುಬ್ರಹ್ಮಣ್ಯ ಭಟ್ ಜತೆಗೂಡಿ ಮರೆಯದ ಹಿಮ್ಮೇಳದ ರಸಾಸ್ವಾದನೆಯನ್ನು ಅಂದು ಉಣಬಡಿಸಿದರು. ಹೊಂದಾಣಿಕೆಯ ಹಿಮ್ಮೇಳ ಇದ್ದರೆ ಯಕ್ಷಗಾನ ಹೇಗೆ ಕಳೆ ಕಟ್ಟುತ್ತದೆ ಎಂಬುದಕ್ಕೆ ಇದು ಸಾಕ್ಷಿಯದಂತೆನಿಸಿತು.
ಅಮ್ಮಣ್ಣಾಯಾರ ಭಾಗವತಿಕೆಯ ಇಂಪಾದ ಸ್ವರದ ಪ್ರಭಾವ ಅದು ಸವಿಯುವಾಗಲೇ ಅನುಭವವೇದ್ಯವಾಗುವುದು. ಮಾಧುರ್ಯ ತುಂಬಿದ ಕಂಠ ಸೌಮ್ಯತೆಯ ಅನುಭವ ತಂದರೂ ಗಡಸುತನದ ಛಾಯೆಯಲ್ಲೇ ಮಾರ್ದನಿಸುತ್ತದೆ. ಯಕ್ಷಗಾನಕ್ಕೆ ಒಪ್ಪುವ ಆ ಗಡಸು ಸ್ವರ ಇತ್ತೀಚಿಗೆ ತುಂಬಾ ಪಳಗಿದಂತೆ ಅನುಭವದ ಸೆಲೆಯನ್ನು ತೋರಿಸುತ್ತದೆ. ಸುಲಭವಾಗಿ ಯಕ್ಷಗಾನ ಭಾಗವತಿಕೆಯನ್ನು ಆಸ್ವಾದಿಸಬಹುದಾದ ಭಾಗವತಿಕೆ ಇವರದ್ದು. ರಂಗದ ಮೇಲೆ ಬಂದ ಮೇಲೆ ಶಿಸ್ತಿನ ಸಿಪ್ಹಾಯಿಯಂತೆ ತಣ್ಣಗೆ ಪಾತ್ರಧಾರಿಯನ್ನೇ ಗಮನಿಸುತ್ತಾ ಆತನ ಹಿನ್ನೆಲೆಯ ಅಭಿನಯದಲ್ಲೇ ಮುನ್ನೆಲೆಯನ್ನು ಸಮರ್ಥವಾಗಿ ನಿರ್ವಹಿಸುವ ಚಾಣಾಕ್ಷತೆ. ಅನಗತ್ಯ ಹರಟೆ ಹೊಡೆಯದ ಪ್ರದರ್ಶನದಲ್ಲೇ ತಲ್ಲೀನನಾಗುವ ಇವರ ಕಲೆಯ ಮೇಲಿನ ಅರ್ಪಣಾ ಭಾವ, ಶಿಸ್ತು ಇಂದಿನ ಯುವ ಕಲಾವಿದರಿಗೆ ಅನುಕರಣೀಯ. ಹೆಗಲ ಉತ್ತರೀಯದ ನೂಲಿನ ಎಳೆ ಕೂಡ ಅಲುಗದಂತೆ ಆರಂಭದಿಂದ ಕೊನೆಯವರೆಗೂ ಸ್ತಿತಪ್ರಜ್ಞರಾಗಿ ಪ್ರೇಕ್ಷಕರೊಂದಿಗೆ ಸ್ವರದಿಂದ ಒಂದಾಗಿ ಬೆರೆಯುತ್ತಾರೆ. ಇಂಪಾದ ಗಾನ ಮಾಧುರ್ಯದ ಹೊನಲನ್ನು ಯಕ್ಷಗಾನ ರೀತಿಯಲ್ಲಿ ಸವಿಯಬೇಕಾದರೆ ಇವರ ಭಾಗವತಿಕೆ ಹೆಚ್ಚು ಸೂಕ್ತವೆನಿಸುತ್ತದೆ. ಒಂದೊಮ್ಮೆ ಭೋರ್ಗರೆವ ಹೊಳೆಯಂತೆ ಧುಮ್ಮಿಕ್ಕಿದರೆ ಮರುಕ್ಷಣ ಮಂದಗಾಮಿನಿಯಂತೆ ಶಾಂತವಾಗಿ ಪ್ರವಹಿಸುತ್ತದೆ.
ದಿವಂಗತ ದಾಮೋದರ ಮಂಡೆಚ್ಚ ಭಾಗವತರ ಪ್ರಭಾವ ಹೆಚ್ಚಾಗಿ ಕಂಡು ಬಂದರೂ ದಿವಂಗತ ಕಾಳಿಂಗ ನಾವಡರ ಶೈಲಿಯನ್ನು ಇವರಷ್ಟು ಸಮರ್ಥವಾಗಿ ಕರಗತ ಯಾರೂ ಮಾಡಿಲ್ಲ ಇದು ನನ್ನ ಭಾವನೆ.ಆರಂಭದಲ್ಲಿ ತಣ್ಣಗೆ ನಿಧಾನವಾಗಿ ಆರಂಭವಾಗುವ ಇವರ ಭಾಗವತಿಕೆ ಮತ್ತೆ ರಾಗ ಸುಧೆಯಲ್ಲಿ ಪ್ರೇಕ್ಷಕರನ್ನು ಮುಳುಗಿಸಿ ಆ ರಾಗದ ಗುಂಗು ಯಕ್ಷಗಾನ ಮುಗಿದು ದಿನಕಳೆದರೂ ಹಾಗೇ ಮಧುರ ಅನುಭವದ ಸಿಂಚನವನ್ನು ಕೊಡುತ್ತದೆ.
ಇವರಿಗೆ ಹಲವರು ಹಿಮ್ಮೇಳಕ್ಕೆ ಸಹಕಾರಿ ಯಾಗಿದ್ದರೂ ಇವರ ಇತ್ತೀಚೆಗಿನ ಜತೆಗಾರಿಕೆ ಮಾಂತ್ರಿಕ ಹಸ್ತದ ಮದ್ದಲೆಗಾರ ಪ್ರಭಾಕರ ಗೋರೆ ಹಾಗು ದೇಲಂತ ಮಜಲು ಸುಬ್ರಹ್ಮಣ್ಯ ಭಟ್. ಈ ತ್ರೀ ಮೂರ್ತಿಗಳು ಜತೆಗೂಡಿದರೆ ಅದ್ಭುತ ಹಿಮ್ಮೇಳದ ಅನುಭವವನ್ನು ಖಂಡಿತವಾಗಿ ಸವಿಯಬಹುದು. ನನ್ನ ಅಂಬೋಣದಂತೆ ಗೋರೆಯವರ ಮದ್ದಲೆ ವಾದನ ಇವರ ಭಾಗವತಿಕೆಗೆ ಹೆಚ್ಚು ಒಪ್ಪುತ್ತದೆ. ಇವರ ಪ್ರತಿಯೊಂದು ಪದಕ್ಕೂ ಗೊರೆಯವರು ಮಾನಸಿಕ ಭಾಷೆಯಲ್ಲಿ ಹತ್ತಿರವಾಗುತ್ತಾರೆ. ಪದವನ್ನು ಹಿಂಬಾಲಿಸುವ ರೀತಿ, ಆ ಪದವನ್ನು ಸ್ವತಹ ಆಲಿಸಿ ಅದರಲ್ಲಿ ತಲ್ಲೀನನಾಗಿ ಬಾರಿಸುವ ಅವರ ವಾದನ ಶೈಲಿ ಆ ಶರೀರ ಭಾಷೆ ನೋಡುಗರಿಗೆ ಅದೊಂದು ಚಿತೊಹಾರಿ ಅನುಭವ. ಗೋರೆ ಎಂಬ ಈ ಅದ್ಭುತ ಕೈಚಳಕದ ಮದ್ದಲೆ ವಾದಕ, ಯಕ್ಷಗಾನದ ಮದ್ದಲೆ ವಾದನದಲ್ಲಿ, ಯಕ್ಷಗಾನ ಲಯಕ್ಕೆ ಒಪ್ಪುವಂತೆ ತಬಲಾ ವಾದನವನ್ನೂ ಆವಿಷ್ಕರಿಸಿದವರು. ಆ ಮೂಲಕ ಹಿಮ್ಮೇಳಕ್ಕೆ ಮಾಂತ್ರಿಕ ಸ್ಪರ್ಶವನ್ನು ನೀಡಿ ಯಾವುದೇ ಭಾಗವತರ ಭಾಗವತಿಕೆಯ ಯಶಸ್ಸಿಗೆ ದೇಣಿಗೆ ನೀಡುವಲ್ಲಿ ಸಮರ್ಥರಾದವರು. ಇವರೊಂದಿಗೆ ಹಿಮ್ಮೇಳಕ್ಕೆ ಜತೆಯಾದರೆ ಯಕ್ಷಗಾನ ರಸಿಕರಿಗೆ ಮತ್ತೆ ಬೇರೆ ಔತಣ ಬೇಡ.
ಅಮ್ಮಣ್ಣಾಯರೊಂದಿಗಿನ ಗೋರೆ ಯಕ್ಷಗಾನ ಲೋಕ ಇತ್ತೀಚಿಗೆ ಕಂಡ ಅದ್ಭುತ ಜೋಡಿ. ಇದರೊಂದಿಗೆ ದೇಲಂತ ಮಜಲು ಅವರ ಚೆಂಡೆ ಇದ್ದರೆ ಅದು ಇನ್ನೊದು ಮಜಲನ್ನು ತೆರೆದು ತೋರಿಸಿದಂತೆ. ಇವರು ಸೌಮ್ಯ ಪದಗಳಿಗೆ ಮಾತ್ರ ಸೀಮಿತ ಎಂಬ ಎಣಿಕೆಯನ್ನು ಇವರು ಹಲವು ಸಲ ತಮ್ಮ ರಂಗದ ಮೇಲಿನ ಕಸುಬಿನಿಂದಲೇ ತಪ್ಪೆಂದು ಸಾಧಿಸಿ ತೋರಿಸಿದ್ದಾರೆ. ಪ್ರಸಂಗ ಎಳ್ಳು ಎಡವದೇ ಒಂದೇ ರೀತಿ ಸಾಗುವುದು ಇವರ ಭಾಗವತಿಕೆಯಲ್ಲಿ ನಾನು ಕಂಡುಕೊಂಡ ಮುಖ್ಯ ಲಕ್ಷಣ. ಸೀತಾ ಪರಿತ್ಯಾಗ.. ಅಥವಾ ಮಾನಿಷಾದ ಎಂಬ ಯಶಸ್ವಿ ಪ್ರಸಂಗ ಇವರಂತೆ ಆಡಿಸುವವರು ಯಾರೂ ಇರರಲಾರರು.
ಹೊಗಳಿಕೆಗೆ ಉಬ್ಬದ ತೆಗಳಿಕೆಗೆ ಸ್ಥಿತಪ್ರಜ್ಞತೆ ತೋರುವ ಇವರು ತನ್ನ ಭಾಗವತಿಕೆಯ ಮಧುರ ಕಂಠದಿಂದಲೇ ಮಾತಾಡುವ ಮೌನಿ ಇವರು.ಯಕ್ಷಗಾನ ಲೋಕದಲ್ಲಿ ಇನ್ನೂ ರಸಿಕರನ್ನು ರಂಜಿಸಿ, ಆ ಮೂಲಕ ಅದ್ಭುತ ಕಲೆ ಯಕ್ಷಗಾನಕ್ಕೆ ಇವರ ಸೇವೆಯು ಲಭ್ಯವಾಗುವ ವಿಪುಲ ಅವಕಾಶಗಳು ಇನ್ನೂ ಭಗವಂತನು ಅನುಗ್ರಹಿಸಲಿ .ಇದು ಅಮ್ಮಣ್ಣಾಯ ಸ್ವರ ರಸಿಕರ ಹರಕೆ.
